Goi-mailako deposituak behar dituen birgaitze-lanen artean inportanteena da deposituko paretek dituzten filtrazioak eta isuriak konpontzea. Obra deposituaren paretak altxatzeko aprobetxatuko da, horrela deposituaren biltze-ahalmena handituko da. Egun, ur-kantitate adierazgarriak galtzen ditu deposituak eta lan horien bidez galerak hutsera ekarri nahi dira. Halaber, sendotasuna eman nahi zaie deposituaren paretei. Gainera, depositura iristeko bidea ere konponduko da.

Gipuzkoako Foru Aldundiko Ingurumen eta Obra Hidraulikoetako Departamentuak 30.000 euroko inbertsioa egingo du uraren biltegi nagusia birgaitzeko lanak egiteko. Biltegi horrek edateko ura emango die hiriguneari eta Sakamidra, Azaldegi eta Aldapa eremuetako etxebizitzei.

Inaki Irazabalbeitiak, herriko alkateak,  eskertu egin du  Ingurumen Sailak Alkizako herritarren bizi-kalitatea hobetzeko hartu duen konpromisoa, “berregokitze-lan hori oso garrantzitsua da, eta ziur gaude, obrak amaitu ondoren, zerbitzu hobea eskainiko zaiola udalerriko biztanleei”.